Наһийәниң келәчиги зор

0
219

Йеқинда жумһурийәтлик «Қазақ радиосы», «Қазақстан Zaman», «Президент және халық», вилайәтлик «Жетісу» һәм «Огни Алатау», Талдиқорған шәһәрлик «Талдықорған» вә башқиму аммивий әхбарат васитилириниң вәкиллири Әмгәкчиқазақ наһийәсигә қәдәм тәшрип қилип, наһийә нәпәси билән тонушти.Журналистлар әң алди билән наһийәлик һакимийәтниң мәжлисләр залида Алмута вилайәтлик коммуникацияләр хизмити уюштурған брифингқа қатнашти. Наһийә һакими Бинәли Ысқақ наһийәниң ижтимаий вә ихтисадий тәрәққиятиға тохтилип, «100 ениқ қәдәм», «Нұрлы жол», «Иш билән тәминләш-2020», «Агробизнес-2020» вә башқиму ижтимаий маһийити чоң программиларни орунлашта әмәлгә ашурулған ишлар билән тонуштурди.

– Наһийәни индустрияләндүрүш кәң қанат яйди. Мәсилән, елимиз мустәқилликкә еришкән дәсләпки жиллири ишләп чиқирилған мәһсулат 0,3 миллион тәңгини тәшкил қилса, 2015-жили 27,2 миллиард тәңгигә йәтти. Әнди 2016-жили бу көрсәткүчни 29 миллиард тәңгигә йәткүзүшни мәхсәт қиливатимиз. Мундақ яхши нәтижиләргә йетишимизниң асасий сәвәви, наһийәдә йеңидин селинған вә жиддий ремонт қилинған ишләпчиқириш карханилири нурғун. Кейинки 25 жилда хәлиқара стандартларға жавап берәләйдиған «Фудмастер», «Адал» акционерлиқ жәмийити охшаш сүт һәм сүт мәһсулатлирини ишләп чиқиридиған заводлар ечилди. Шундақла  наһийәдә көктат һәм йәл-йемиш вә шарап йетиштүридиған «Голд продукт» акционерлиқ жәмийити, «Био Тау жер», «Арба вайн», «Дионис», «Есік жеміс-консерві зауыты» жавапкәрлиги чәкләнгән йолдашлиқлири бар. Уларниң мәһсулатлири пәқәт Қазақстандила әмәс, бәлки йеқин вә жирақ чәтәлләргиму яхши тонуш. Бийил наһийәдә көктат һәм йәл-йемиш ишләп чиқиридиған, қувити 30,5 миң тонна болған «НурКазАгро» ЖЧЙ,  қувити 380 миң литр болған «Балтабай сүт заводи» ечилди. Мәхсәтлиримизгә йетишимиздә уларму өз үлүшини қошиду. Йеқин арида жилиға 3800 тонна тоху гөшини ишләп чиқиридиған «Нұрлы құс» фабрикиси ишқа қошулуп, 120 иш орни ечилиду. Мәзкүр лайиһәниң умумий баһаси  – 1,8 миллиард тәңгә, – деди Бинәли Әбдиқапас оғли.

Андин наһийә рәһбири энергетика саһасиға тохталди. Түргүн, Ишиктә өстәңлириниң бойидики гидроэлектр станциялириниң қурулуши аяқлашса вә Челәктики қувити 300 МВтни тәшкил қилидиған шамал-электр станциялири ечилса, наһийә өзинила әмәс, бәлки хошниларниму электр қувити билән тәминләйдиған дәрижигә йетиду. Инвестициягә келидиған болсақ, 2016-жилниң 9 ейида наһийәгә 41 миллиард 581 миллион тәңгә инвестиция жәлип қилинған. Бу өткән жил билән селиштурғанда 11 миллиард 890 миллион тәңгигә ошуқ. Йәни, ениқ индекс миқдари – 134,5 пайиз. Наһийәниң йеза егилиги саһасиниң әһвалиму жилдин-жилға яхшиланмақта. Мәсилән, 2011-жили йеза егилигиниң мәһсулати 38 миллиард тәңгә болса, булту 58 миллиард тәңгиниң мәһсулати йетиштүрүлди. Пат йеқинда бу көрсәткүч 61 миллиард тәңгигә йетиду, дәп күтүлмәктә. Бийил ижтимаий қурулушлар саниму тилға аларлиқ дәрижидә көпәйди. Бәйтерек йезида 600 орунлуқ, Азатта 300 орунлуқ мәктәпләр пайдилинишқа берилип, Челәк йезисида 280 орунлуқ балилар бағчиси ечилди. Шундақла, Ишиктә шәһири вә Челәк йезисида 600 орунлуқ йеңи мәктәпләрниң қурулуши башланди. Қырбалтабай, Қорам йезилирида турушлуқ өй селишқа бөлүнгән йәрләргә инфрақурулумлар тартиливатиду.

Докладтин кейинки журналист­ларниң соаллириға жавап қайтурған наһийә һакими туризм саһасини тәрәққий әткүзүш мәхситидә этнойеза ечишқа инвесторларниң жәлип қилинғанлиғини, Ишиктә көлигә, Түргүн чатқаллиқлириға вә Батанға баридиған йолларниң жөндәлгәнлиги һәққидә ейтип өтти.

Аммивий әхбарат васитилириниң вәкиллири «Есік тарихи-мәдени қорық-мұражайы» мирасгаһида, «Алтын Есік» белиқ егилигидә, Ишиктә шәһиридики санаториялик типтики «Аяла» балилар бағчисида, Бөлек йеза округидики «Фауна» төгә қуши фермисида вә Бәйтерек йезисидики «Асфальтбетон» жавапкәрлиги чәкләнгән йолдашлиғида болди.

Рашидәм РӘҺМАНОВА, Әмгәкчиқазақ наһийәси. 

Бөлүшүш:
Реклама

ЖАВАП ҚАЛДУРУҢ

Пожалуйста, введите ваш комментарий!
пожалуйста, введите ваше имя здесь