Келәчәк егилиригә —мәйрәмлик соға

0
167

1-декабрь – Тунжа Президент күни һарписида Әмгәкчиқазақ наһийәсиниң Йеңишәр йезисида 160 орунлуқ «Раяна» балилар бағчиси тәнтәнилик ечилди. «Тижарәтниң йол хәритиси-2020» дөләт программиси даирисидә «Даму» фондиниң ярдими билән келәчәк егилири – гөдәклиримизгә ғәмхорлуқ қилған тижарәтчиләр Руслан вә Ибадәт, уларниң оғли Һәмражан вә қизи Русудан Һосмановлар.Йеңишәр йеза округиниң һакими Асыл Байтулақовниң ейтишичә, бу аилиниң округниң ихтисадини тәрәққий әткүзүшкә төһпә қошуп келиватқиниға 12 жилдин ешипту. Уларниң шәхсий дуканлири вә навайханиси бар. Шәһәргә иш издәп кәткән яшларниң йезиға қайтип келишигә вә туғулуватқан балиларниң көпийишигә бағлиқ округта турғунлар сани кейинки жиллиридила 6,5 миңдин 8 миңға йәткән. Жүригидә жутиға дегән оти бар инсанларниң ярдими билән округқа қарашлиқ Космос йезисидиму йеқинда 35 орунлуқ балилар бағчиси ечилди.

– Дунияда орун еливатқан қийин вәзи­йәтләргә қаримай, чарәк әсирдә Қазақстан егиз чоққилардин көрүнди. Бу – Президентимизниң даналиғи, әл тәрәққия­тидики бебаһа әжри, – деди тәнтәнилик мәрасимни ачқан Әмгәк­чиқазақ наһийәси һаки­миниң биринчи орунбасари Нуржан Қудайбергенов мәйрәм иштракчилирини Тунжа Президент күни билән қизғин тәбрикләп. Андин натиқ Қазақстан хәлқиниң Нурсултан Назарбаевниң рәһбәрлигидә 25 жилда еришкән утуқлириға тохталди вә сахавәтлик инсан Руслан Һосмановқа наһийә рәһбәрлиги вә турғунлири намидин сәмимий миннәтдарлиғини билдүрүп, «Раяна» балилар бағчисиниң коллективиға қийин, бирақ шәрәплик ишида утуқ тилиди.

2012-жили билән селиштурғанда, наһийәдә бала сани 7 миңға өскән. Шуниңға бағлиқ, бийил наһийәдә икки мәктәп вә бир балилар бағчиси селинса, икки мәктәп вә икки балилар бағчиси жиддий ремонттин өтти. Умумән, 875 орунлуқ дөләт вә шәхсий балилар бағчилири ечилип, мәктәп йешиғичә болған балиларниң 80,6 пайизи мәктәпкичә тәрбийә билән тәминләнди. Мустәқилликниң 25 жиллиғиға Алмута вила­йитидә 25 балилар бағчиси ечилса, уларниң иккиси Әмгәкчиқазақ наһийәсидә қәд көтәрди.

Кейин сөзгә чиққан Руслан Һосманов «Раяна» балилар бағчисиниң қурулушида өзини қоллап-қувәтлигән наһийәлик вә йәрлик һакимийәткә, өз пәрзәнтлирини бағ­чиға ишәш қилип тапшурған жутдашлириға миннәтдарлиғини изһар қилип, үч тиллиқ тәрбийә беридиған «Раянада» балиларниң һәртәрәплимә тәрбийилинип, мәктәпкә пухта тәйяр болуп йетилип чиқидиғанлиғиға үмүт билдүрди.

Тәнтәниниң тәсират­лиқ пәйти – лента қийиш һөрмити Нуржан Қудайбергеновқа, йеза мөтивәрлири Ағила Смағулова билән Әнвәр Һошурбақиевқа, әлвәттә, бүгүнкидәк хошаллиқ дәмлирини һәдийә қилған Руслан Һосмановқа (сү­рәттә солдин биринчи) берилди. Андин көпчилик балилар бағчисиниң бөлмилирини арилап, гөдәкләрниң һүнәрлирини.

Йеңи бағчиниң рәһбири Зоһра Әршидинова – алий билимлик педагог.  Һазирчә бу йәрдә 1 — 6 яш арилиғидики 113 бала тәрбийилиниветипту. Музыка зали, спорт зали, «Өзини-өзи тонуш», қазақ тили, психология, медицина, методика кабинетлири, ашханиси бар. Барлиғи болуп, 35 адәм хизмәт қилса, уларниң тоққузи алий билимлик тәрбийичи.

Мәрасимда сөзгә чиқ­қан наһийәлик Уйғур этномәдәнийәт мәркизиниң рәиси, ЖУЭМ рәисиниң орунбасари Сулайман Мәхсүтов, Ишиктә реги­онлуқ Ханим-қизлар кеңи­шиниң рәиси Нурбүви Насирова, наһийәниң баш имами Сапархан Төреқулов вә башқилар бағчә паа­лийитигә утуқ тиләп, мәрасим иштракчилири билән бағчиниң дәсләпки тәрбийиләнгүчилирини қош мәйрими би­лән тәбриклиди. «Йеңи­шәр» Жәмийәтлик бирләш­ми­синиң рәиси Реһимжан Ибдиминов вә йезиниң жигитбеши Қурванжан Азнибақиев жутдашлири намидин балиларға атиған соғилирини тапшурди.

Шуни қошумчә қилиш керәкки, мәйрәм һарписида наһийәниң Түргүн йезисида «Санел» вә Бәйдибек би (бурунқи Маловодное) йезисида «Достық» 50 орунлуқ шәхсий балилар бағчилири ечилди.

Рашидәм РӘҺМАНОВА. Әмгәкчиқазақ наһийәси.

Бөлүшүш:
Реклама

ЖАВАП ҚАЛДУРУҢ

Пожалуйста, введите ваш комментарий!
пожалуйста, введите ваше имя здесь