«Достық дастарханы» миллий таамлар фестивали өтти

0
152

       Алмутидики Достлуқ өйидә 1-май Қазақстан Хәлқи бирлиги күнигә беғишланған «Достық дастарханы» намлиқ миллий таамлар фестивали болуп өтти. Мәдәний чарә-тәдбиргә Қазақстан Хәлқи Ассамблеяси рәисиниң орунбасари- Кативат рәһбири Жансеит Қансеитоғли Түймебаев, Қазақстан Жумһурийити Парламент Мәжлисиниң, Алмута шәһәрлик мәслиһәтниң депутатлири, дөләтлик идариләрниң вәкиллири, зиялилар, жумһурийәтлик вә шәһәрлик этномәдәнийәт мәркәзлириниң рәислири, этномәдәнийәт бирләшмиләрниң яшлири,  мухбирлар қатнашти. 

       Фестиваль жәриянида һәр хил этномәдәнийәт мәркәзлири таамлар көргәзмилирини уюштуруп, бу йәрдә түрлүк таамларниң тәйярлиниши, уларниң адәм саламәтлиги үчүн қандақ пайдиси бар екәнлиги һәққидә баян етилди. Униңдин башқа меһманларни қарши елиш рәсим-қаидилири қатнашқучилар диққитигә тәғдим қилинди. Этномәдәнийәт мәркәзлириниң ижадий коллективлириниң орунлишидики миллий нахша-саз, уссуллар мәрасимниң техиму қизиқарлиқ өтүшини тәминлиди. Фестивальға қәдәм тәшрип қилған  Қазақстан Хәлқи Ассамблеяси рәисиниң орунбасари- Кативат рәһбири Жансеит Қансеитоғли Түймебаев вә башқиму һөрмәтлик меһманлар көргәзмини арилап чиқти. Жумһурийәтлик Уйғур этномәдәнийәт мәркизи тәрипидин уюштурулған көргәзмисини зиярәт қилғанда, меһманлар карнәй-сүрнәйләр һәм миллий уссулар билән хошал-хорам қарши елинди. Мәркәз намидин Жансеит Қансеитоғлиға уйғур дописи вә миллий саз әсваплиридин уйғур дутари соға қилинди. Атақлиқ рәссам Әхмәтжан Әһәт қия таш (петроглиф)  рәсимлиридин өз әмгәклириниң бирини һәдийә қилди.

           Мәдәний чарә-тәдбир һәр түрлүк этносларниң миллий таамлирини тонуштуруш арқилиқ төзүмлүк билән мәдәнийәтләр ара чүшәнчини күчәйтиш  охшаш мәсилиләрни көздә тутқан. Шуниң билән биллә фестиваль яшларни этносларниң тамақлиниш мәдәнийити вә меһмандостлуғи билән тонуштурушниң бир амили болуп һесаплиниду. Мәзкүр лайиһә барчини бир ишниң әтрапида  бириктүрүп, түрлүк мәдәнийәтләрниң қирлирини ечишқа өз һәссисини қошудиғанлиғи аян.

                                                                    Гүлжамал Имәржан журналист        

Бөлүшүш:
Реклама