Ғалибийәт әскәрлири

0
148

               Бийил Улуқ Вәтән уришиниң аяқлашқиниға 74 жил толупту. Һазир шу дәһшәтлик урушниң тирик гувачилириниң сепи күндин күнгә шалаңлишиватмақта. Әйнә шу инсанларға һөрмәт билдүрүш бизниң муқәддәс борчимиз. Шундақ нийәттә йеқинда Алмутидики Достлуқ өйиниң уюштуруши билән 9-май Ғалибийәт күнигә беғишланған  «Ғалибийәт әскәрлири» намлиқ тәнтәнилик мәрасим болуп өтти. Қазақстан Жумһурийтиниң тунжа Президенти-Елбасы Нурсултан Назарбаевниң «Рухани жаңғыру» программиси вә яшлар жили чәмбиридә өткән бу чарә-тәдбир Қазақстан Жумһурийтиниң «Жәнубий» миллий гвардиясиниң тәвәлик башқармиси билән Темирбек Жургенев намидики Сәньәт Академиясиниң қоллап-қувәтлиши билән өтти. Мәрасимға Алмута шәһәрлик Қазақстан Хәлқи Ассамблеяси кативатиниң рәһбири Нурлан Балғымбаев, Қазақстан хәлқи Ассамблеясиниң, шәһәрлик этномәдәнийәт мәркәзлириниң, шундақла «Жаңғыру жолы» вә «Жарасым» яшлар бирләшмилириниң әзалири иштрақ қилди. Чарә-тәдбир давамида  Қазақстан Хәлқи Ассамблеясиниң «Айбын» һәрбий-патриотлуқ клубиниң һәм яшлар бирләшмиләрниң әзалири Улуқ Вәтән уруши ветеранлири билән һәмсөһбәттә болди. Бу яшларниң патриотлуқ сезимлирини ойғитишта һәм әвлатлар мувапиқлиғи мәхситидә уюштурулди.

Кеңәш Иттипақи вә Қазақстан Жумһурийтиниң һәрбий күчлириниң ветерани, «Арыстан» мутәхәссисләндүрүлгән лицейиниң чоң оқутқучиси, истипадики полковник Владимир Денесюк уруш жиллири еғир балилиқ чағни бешидин өткәзди. У 7-8 йешида 3 жил давамида Германия концлагерида мәһбус болди.

—-«Бүгүн Алмутида биз аз қалдуқ,»- дәйду сөһбәт ара Владимир Михайлович. « Ветеранлар бари йоқи 44 адәм қалди, уларниң ичидә 32 орун тутуп  йетип қалғанлар. Ечинарлиқ йери, бизни пәқәт Ғалибийәт күнила есиға алиду. Бу барлиқ Жумһурийәттә можут һадисә…

Мән Алмутида 1954-жилдин тартип өмүр сүрүватимән. Пәхринилидиған йерим, елимиздә мән өзәмгә чүшлуқ һөрмәткә егә. «Арыстан» мутәхәссисләндүрүлгән лицейида мәмликитимизниң келәчәк һәрбий элитасини тәрбийәләватимиз. Уруш жиллири  болса, көп қийинчилиқларни баштин кәчүрдуқ, концлагерьда көрмигинимиз аз болди. Ғалибийәт күнини шу йәрдә қарши алдуқ. 30 февраль күни лагерьда бирму немис қалмиди. Бирла ишик ачидиған немис бовай болди. У өзи антифашист болған екән. Шу бовай 2 май күни телебункенниң авазини қаттиқ чиқардидә, у йәрдин Левитанниң «Уруш түгиди!» дегән сөзини аңлидуқ. Бәхтимизниң чеки болмиди. Зулумдин һәқиқәтән қутулғинимизға бир ишинип, бир ишәнмидуқ. Түрмә ичидә  күлкә вә жиға-зарә арилишип кәтти. Мениң балилиқ хатирәмгә бу дәқиқиләр мәңгүгә сақлинип қалди. Бүгүнки күндә нәгә бармай, Алмутиға қайтип келишкә алдираймән. Сәвәви, бу мениң Вәтиним. Мән мошу йәрдә билим алдим, адәм болдум, аилә қуруп, қизим дунияға кәлди.»

Бу күни ветеранларниң диққитигә ижадий коллективлар тәрипидин тәйярланған концертлиқ программа тәғдим етилди вә Қазақстан Хәлқи Ассамблеясиниң «Қамқор» акцияси чәмбиридә уларға баһалиқ соғилар тапшурулди.

                                    Гүлжамал Имәржан журналист

Бөлүшүш:
Реклама

ЖАВАП ҚАЛДУРУҢ

Пожалуйста, введите ваш комментарий!
пожалуйста, введите ваше имя здесь