Шаһимәрдан Нурумов : Һөрмәтлик оқурмән!

0
121

 

Биз технологиялик тәрәққият заманида яшаватимиз, ІТ-технологияләр күн санап тәрәққий әтмәктә. Интернет һәммимиз үчүн адәттики нәрсигә айланди. Нәқ шу интернет арқилиқ силәр бүгүнки күнниң йеңилиқлирини билип турисиләр. Дәсләпки күнләрдин башлапла бизниң планлиримизда яш әвлат вәкиллиригә уйғур хәлқиниң тарихидин, мәдәнийитидин, әнъәнилиридин вә башқиму муһим вақиәләрдин мәлумат беридиған рәсмий портал, йәни  Қазақстан уйғурлириниң  жумһурийәтлик этномәдәнийәт мәркизиниң  порталини ечиш вәзиписи болған. Мана әнди шу ишни қолға елип олтиримиз.

Қазақстан Жумһурийитиниң барлиқ вилайәтлиридә, чоң шәһәрлиридә вә наһийәлиридә бизниң мәркәзниң шөбилири бар. Һәммиси алаһидә паалийәтчанлиқ билән иш елип бармақта. Мошу интернет ресурс арқилиқ уларниң паалийитини тонуштуридиған болимиз. Шундақла силәрни  елимиздә йүз бериватқан вә миллий мәркизимизгә аит  йеңилиқлардин  хәвәрдар қилимиз. Жумһурийәтлик уйғур этномәдәнийәт мәркизи Қазақстан хәлқи Ассамблеясиниң байриғи астида паалийәт жүргүзиду вә елимиздики хәлиқләр достлуғи билән милләтләрара разимәнликни мустәһкәмләш йөнилишидә чоң ишларни әмәлгә ашуриватиду.

Милләт Лидериниң дана сәясити түпәйли Қазақстанда  Қ.Ғожамияров намидики Уйғур дөләт академиялик музыкилиқ комедия театри ишләватиду, жумһурийәтлик «Уйғур авази» гезити чиқиватиду, уйғур тилида билим беридиған мәктәпләр паалийәт жүргүзмәктә. Әнди уларниң  қатариға ана тилимиздики  йеңилиқлар портали қошулди. Муһими, елимиздики  течлиқ вә разимәнликни сақлап, уни һәртәрәплимә риважландуруш йолида  қазақстанлиқ уйғурлар тәрипидин әмәлгә ашурулуватқан  ишларни йорутуш   арқилиқ заманға  лайиқ паалийәтни қолға алдуқ.

Һөрмәтлик достлар, һәммиңлар биз үчүн наһайити қиммәт. Шу сәвәптин бизниң интернет ресурсимизни зиярәт қилип турушиңларни илтимас қилимиз. Шундақла турақлиқ алақидә  болуп, интернет-порталимиз арқилиқ  пикир-тәклиплириңларни бериду һәм өзәңларни қизиқтурған соаллириңларни қойиду дегән үмүттимиз.

Һөрмәт вә изгү нийәтләр билән

Қазақстан Жумһурийити  Парламенти Мәжлисиниң   депутати, Қазақстан хәлқи Ассамблеяси Кеңишиниң әзаси, «Қазақстан уйғурлириниң жумһурийәтлик этномәдәнийәт мәркизи» жәмийәтлик бирләшмисиниң рәиси Шаһимәрдан  Үсәйиноғли НУРУМОВ

Бөлүшүш:
Реклама

ЖАВАП ҚАЛДУРУҢ

Пожалуйста, введите ваш комментарий!
пожалуйста, введите ваше имя здесь