«Течлиқ вә бирлик» -«Peace and Unity» хәлиқ ара веложүрүш қатнашқучи қазақстанлиқ яшлиримизға ақ йол!

0
616

 Гүлжамал Имәржан:

               Тонушуп қоюңлар: Дилмурат Абдурешит оғли Рәхмәтулаев- «Течлиқ вә бирлик» -«Peace and Unity» хәлиқ ара веложүрүшиниң (велопробег) қатнашқучиси. Веложүрүш яшлар жилиға беғишланған болуп,  Қазақстан Хәлқи Ассамблеясиниң вә Бүйүк Британияниң Қазақстандики әлчиханисиниң  қоллап қувәтлиши билән Қазақ география жәмийити тәрипидин уюштурулди. Униңға һәр хил милләт вәкиллиридин болған 6 қатнашқучи ( 2 қиз, 4 жигит) иштрақ қилмақта. Улар: қазақ, рус, корей милләт вәкиллиридин -Марина Варибрус, Балжан Балташева, Михаил Лим, Азамат Атантай, Даулет Омаров вә уйғурлардин Дилмурат Рәхмәтулаев.

    Дилмурат Абдурешит оғли Рәхмәтулаев- 1983-жили Алмутида туғулған. Жәнубий пайтәхттики Нархоз университетида тәһсил көрүп, бу алий оқуш орниниң  магистратурисида « Һесават вә аудит» мутәхәссисилиги бойичә билим алди. Униң кейин Т.Рысқулов намидики Қазақ Миллий экономика университетиниң «Һесават и әхбарат  технологиялири» факультетида «Бухгалтерлиқ һесават вә аудит» мутәхәссислиги бойичә оқуди. Бүгүнки күндә «Fincraft Resources» акционерлиқ жәмийитидә бухгалтер болуп хизмәт қиливатиду. Спортниң бир нәччә түри- бокс, велоспорт, альпинизм, жүгрәш билән шуғулинип, утуқларға еришти. Дилмурат бокс бойичә 1 разряд егиси,  1998-жили Пирмуһәммәт Кузиев намидики хәлиқ ара мусабиқиниң ғалипкари. 2013-жилдин башлап һәр жили Алмутида  өтүватқан 10 км, 14 км, 21 км, 42 км мусапилири бойичә һәр хил марафонларниң қатнашқучиси.

«Течлиқ вә бирлик» -«Peace and Unity» хәлиқ ара веложүрүши сағлам һаят тәризини тәрғип қилишқа һәм  зиярәт қилған мәмликәтләрдә Қазақстанниң мәдәнийити билән  тонуштуруп, алға сүрүшкә беғишланған. Лайиһә 2019-жилниң 29-апрель күни Англияниң пайтәхти Лондон шәһиридә  башлинип, 6 июль-пайтәхтимизниң туғулған күнидә  Нур-султан шәһиридә аяқлишиду. Веложүрүш жәриянида 7 дөләтни вә уларниң 7 пайтәхтини зиярәт қилиш планланмақта.

Йеқинда Дилмурат биз билән тор бети арқилиқ алақиға чиқип, мәғрурлиниш илкидә өз һиссиятлири билән бөлүшти:

—-«Бу сәпәргә атланғинимға наһайити хурсәнтмән, чүнки дунияни көрүш пурситигә егә болдум. Шундақла мениң мәхситим, өйдин жирақ туруп, өзәмни өзгәртиш, йәни ойлиримни жиғивелиш вә өз алдимға иш қилишни билиш. Мошу сәпәр жәриянида өзимиз қәдәм тәшрип қилған мәмликәтләрдә вә шәһәрләрдә көңлүмгә наһайити яққан йери, бу йәрдә велосипед мәдәнийити үстүн. Велосипедист автомобиль һайдиғучилардин жуқури туриду. Әгәр велосипедист келиватса, йеник машинилар тохтап, униңға йол бериду. Берлинда велосипедистларниң һоқуқи бузулса,  жәриман селинидекән. Пурсәттин пайдилинип, Қазақ географиялиқ жәмийитиниң президенти Төлеген Тастанбековқа вә мәзкүр жәмийәтниң ғәмхорлуқ кеңишиниң(попечительский совет) рәиси Нурлан Абдуовқа чәксиз миннәтдарлиғимни изһар қилимән, »-дәйду Дилмурат.

Бүгүнки күнгичә «Течлиқ вә бирлик» -«Peace and Unity» хәлиқ ара веложүрүшиниң қатнашқучи қазақстанлиқ яшлар 5 дөләтниң 5 пайтәхтини зиярәт қилди, улар- Лондон- Брюссель- Гаага- Берлин- Варшава. Алдида Минск-Москва-  Нур-султан. Биз батур яшлиримизға, жүмлидин Дилмурат инимизға ақ йол тиләймиз һәм алдиға қойған мәхситигә йетип, теч аман Вәтинимизгә қайтип келишини тиләймиз!

Бөлүшүш:
Реклама

ЖАВАП ҚАЛДУРУҢ

Пожалуйста, введите ваш комментарий!
пожалуйста, введите ваше имя здесь