Ахирқи коңғурақ мәйрими өтти

0
359

 

25 май күни барлиқ қазақстанлиқ мәктәпләрдә охшаш Алмутидики Абдулла Розибақиев намидики  №153 уйғур гимназиясидиму «Ахирқи қоңғурақ» мәйрими өтти. Тәнтәнилик мәрасимға Жумһурийәтлик Уйғур этномәдәнийәт мәркизиниң башқарма әзалири, наһийәлик билим башқармисиниң вәкиллири, хәлқимизниң көрнәклик алимлири, шаир вә язғучилири, жут мөтивәрлири, һөрмәтлик дәм елиштики пешқәдәм устазлар вә сабиқ учумкарлар иштрақ қилди. 2016-жилниң ноябрь  ейидин башлап гимназия ЮНЕСКО қаримиғидики мәктәпләр қатариға кирип, уюштуруливатқан барлиқ билим, мәдәнийәт, илмий иш чарилиригә қатнишип келиватиду. Бийил ЮНЕСКО қаримиғидики мәктәпләрниң оқуғучилири ижад қилған шеирлар топлимиға мәзкүр гимназияниң бир нәччә оқуғучисиниң шеирлири киргүзүлди. Мәрасимда география пәнлириниң доктори, профессор Шерипжан Надиров яш ижаткарларни тәбрикләп, уларға ушбу топламларни тапшурди. Чарә тәдбир давамида әньәнә бойичә гимназия йенидики « Мәктәп учумкарлири Ассоциацияси» тәрипидин әлачи вә жәмийәтлик ишларға паал қатнашқан оқуғучиларға  Ыбырай Алтынсарин, Абдулла Розибақиев  вә Һенипахун Баратов намидики бәлгү, диплом вә махташ қәғәзлири тапшурулди. Униңдин башқа мәктәп тарихида алаһидә орни бар, уйғур синиплириниң ечилишиға күч чиқарған Савут Кебиров намидики мукапат : маддий мукапат вә диплом,  мәрһумниң оғуллири Рәхмитулла вә Нәғмитулла  тәрипидин һәр хил илмий көрүкләрниң ғалипкарлири вә үлгүлүк оқуғучилириға тапшурулди. Бу күни шундақла жил бойи балиларға билим, тәрбийә берип келиватқан илғар устазларға маддий мукапатлар вә махташ қәғәзлири тапшурулди.

«Бийил мәктивимизни 36 түләк түгүтиватиду, » — дәйду гимназияниң мудири, Алмута шәһәрлик мәслиһәтниң депутати Шавкет Өмәров.  «Мошу балилиримизниң ичидә 5 бала Алтын бәлгүгә үмүткар,  улар дөләт емтиһанини тапшуруп болғандин кейин бәлгүлүк болиду. Бу йәрдә алаһидә 11 «А» синип оқуғучиси Малика Василова тоғрилиқ тохталмақчимән. Бу қизимиз мәктәпни түгәтмәй туруп, елимиздики икки чоң университетиниң студенти аталди. Биринчиси, Сулейман Демирел намидики университетта илмий конкурсқа тапшурған 11 160 балиниң арисидин 2 орунни егәләп, һәқсиз оқушқа йолланма алди. Униңдин башқа Малика дунияға нами тонулған Назарбаев намидики университетниң грантини утувалди. Оқуғучимиз химия биология пәнлири бойичә инглиз тилида емтиһан тапшуруп, 158 балл билән жумһурийәт бойичә иккинчи орунға егә болди.  Малика Василова-бизниң биринчи қалиғичимиз, әнди келәчәктә мана мошундақ оқуғучиларниң бирини әмәс, бир нәччисини тәйярлашқа тиришимиз!»

Сөз новити мәктәпни аяқлаштуриватқан учумкарларға берилип, улар устазлириға өзлириниң миннәтдарлиғини билдүрди. Гүлниса Рахимжанова билән Закир Иминжановларниң ижрасидики «Савақдашлар»  нахшисиға мәктәп вальси    орунланди.

Мәрасим жәриянида гимназияниң талантлиқ оқуғучилири өзлириниң нахша сазлири, әвришим уссуллири билән чарә-тәдбирниң техиму мәзмунлуқ өтүшини тәминлиди.

 

 

 

 

 

 

Бөлүшүш:
Реклама

ЖАВАП ҚАЛДУРУҢ

Пожалуйста, введите ваш комментарий!
пожалуйста, введите ваше имя здесь