Арыс билән биз биллә!

0
409

Түркстан вилайити Арыс шәһиридә йүз бәргән паҗиә пүткүл қазақстанлиқларни бепәрва қалдурмиди. Паҗиәлик вақиә йүз бәргән күндин башлап барлиқ қазақстанлиқлар һисдашлиғини билдүрүп, ярдәм қолини созушқа башлиди. Әлвәттә, қазақстанлиқ уйғурларму бу иштин чәттә қалмиди. Биринчиләрдин болуп җумһурийәтлик Уйғур мәдәнийәт мәркизиниң Җәнубий Қазақстан вилайәтлик шөбисиниң вәкиллири арыслиқларға ярдәмгә кәлди. Улар 500 адәмни үчвақлиқ иссиқ тамақ, кийим-кечәк, ятақлар билән тәминлиди.
Өткән һәптидә ҖУЭМниң бюро әзалириниң селекторлуқ кеңәшмисидә болса, Арысқа ярдәм бериш бойичә комиссия тәшкил қилинип, иш башланған еди. Мана сешәнбә күни Алмутидики АЗТМ заводида Арысқа ярдәм карвинини әвәтиш чарә-тәдбири өтти. Униңға Қазақстан Җумһурийити Парламенти Мәҗлисиниң депутати, ҖУЭМ рәиси Шаһимәрдан Нурумов, шәһәрдики миллий мәдәнийәт мәркәзләрниң, уйғур жутлириниң вәкиллири, журналистлар иштрак қилди. Мәзкүр чарә-тәдбирдә дәсләпки сөз Парламент Мәжлисиниң депутати, КХА Сәясий кеңишиниң әзаси Шаһимәрдан Нурумовқа берилди.
— Арыста йүз бәргән паҗиә һәммимизни тәврәндүрди, – деди Шаһимәрдан Үсәйиноғли. – Тәкитләш лазимки, бу паҗиә аддий хәлиқни, дөләтни, һакимийәтни бирләштүрди. Вақиә йүз бәргән күнниң әтиси Арысқа Президент кәлди. Барлиқ әһвал билән тонушуп, өзиниң баһасини бәрди. Арысқа һәртәрәплимә ярдәм көрситилидиғанлиғини тәкитлиди. Шу күни дәрһал Чимкәнттә, Түркстанда Қазақстан хәлқи Ассамблеясиниң штаб тәшкил қилинди. Мошундақ штаблар барлиқ регионларда қурулди. Барлиқ милләт вәкиллири мошу штаб әтрапиға топлишип иш башлиди. Регионлардики «Достлуқ өйлиридә» хәйрихаһлиқ ярдәм жиғиш пунктлири уюштурулди. Әң муһими, паҗиәдә адәмләр көп зәрдап чәкмиди, паракәндиликкә берилмиди. Тәшкиллик билән адәмләр көчирилди.

Елимиз даирисидә бир һәптә ичидә мисли көрүлмигән хәйрихаһлиқ операция әмәлгә ашурулди. Униңға барлиқ милләт вәкиллириниң волонтерлири паал қатнашти. Бу акцияләр һәқиқәтәнму җәмийәт билән һакимийәтниң бирлигини, миллий роһимизниң күчини намайиш қилди. Мәзкүр хәйрихаһлиқ акциягә өзбәк, әзәрбәйҗан, татар, уйғур, курд, корей, рус вә башқиму миллий мәдәнийәт мәркәзлири паал қатнашти. ҚХА «Арыс біз сіздермен» җумһурийәтлик акциясини қоллап-қувәтлиди. Регионларда умумий җумһурийәтлик Ассамблея күни өтти. Мошу күнләрдә елимиздики барлиқ мәһкимиләр, чоң-кичик коллективлар бир күнлүк маашини арыслиқларға әвәтти. ҚХАниң «Жаңғыру жолы» җумһурийәтлик яшлар һәрикити «Жақсылық жаса» лайиһисини әмәлгә ашурди. Мошу лайиһә даирисидә интернет-акция уюштурулди. Бүгүнгә қәдәр хәйрихаһлиқ акцияләр даирисидә 65 миллион тәңгә жиғилди. Арыс шәһиригә «Хәйрихаһлиқ карвини» билән 100 тонниға йеқин ярдәм йәткүзүлди. 28-июньдин тартип Арыс турғунлири өз өйлиригә қайтип келишкә башлиди. Әнди шәһәрни әслигә кәлтүрүш, қурулуш ишлири башланди. Мана бүгүн новәттики «Хәйрихаһлиқ карвини» Алмутидин Арысқа атлиниду. Бир һәптә ичидә ҖУЭМниң Алмута шәһәрлик шөбиси 9 машина ярдәм жиғди. Һазир бу топланған ярдәм ҖУЭМ Алмута шәһәрлик шөбиси рәисиниң орунбасари Долқунтай Абдухелил өзи тәвсийә қилған мәхсус еғир жүк машинилириға бесилди. Бу йәрдә озуқ-түлүк, кийим-кечәк, қурулуш материаллири, умумән, баһаси 12 миллион тәңгилик 65 тонна жүк бар.
Пурсәттин пайдилинип, өзлири бир машина ярдәм жиғип бәргән Қайрат микрорайониниң турғунлириға, Долқунтай Абдухелилға һәм мошу акциягә бепәрва қаримиған барлиқ қериндашлиримизға чәксиз миннәтдарлиғимни изһар қилмақчимән.
Андин сөзни татар миллий мәдәнийәт мәркизиниң рәиси Нурия Ниязова алди.
Һөрмәтлик қериндашлар. Биз бүгүн новәттики хәйриһахлиқ акциясини өткүзүватимиз, – деди Нурия Ниязова. – 28-июнь күни «Достлуқ өйидә» Арыс балилириға ярдәм бериш бойичә «дүгләк үстәл» өтти. Барлиқ анилиримиз бу акциягә қатнашти. Мана бүгүн мошу йәргә барлиқ милләтләр вәкиллири, активистлар, меһриван җанлар, өзгиниң қайғусиға бепәрва қаримайдиған инсанлар жиғилип олтириду. Арыста қурулуш ишлири башланди. Мән ойлаймәнки, бу ишларниң һәммиси Ассамблея вәкиллириниң иштраки билән жүргүзүлиду. Қазақстан хәлқи Ассамблеясиниң Алмута шәһәрлик шөбиси тәрипидин 25 миллион тәңгидин артуқ мәбләғ жиғилди. Бу ярдәмгә иҗтимаий әһмийити жуқури объектлар әслигә кәлтүрүлиду дәп ойлаймән. Һәммиңларға рәхмәт.
– Қазақстан һәммимизниң умумий өйи, – деди өз новитидә сөз алған «МеталПромГруп» ширкитиниң мудири Долқунтай Абдухелил. – «Бирлик бар йәрдә, тирикчилик бар» дәйду дана хәлқимиз. Мана униңға бүгүн йәнә бир қетим көз йәткүзүватимиз. Қисқа вақит ичидә мошундақ ярдәм жиғип, Арысқа әвәтиш алдида туримиз. Бу ишни һәммимиз өмлүктә, бирликтә, инақ әмәлгә ашурдуқ. Бир атиниң, бир аниниң балисидәк иш қилсақ, биз йәтмәйдиған утуқ болмайду. Қазақстанда течлиқ мәңгү болсекән дәп тиләймиз.
Униңдин кейин сөз талған «Барбанг» курд миллий мәдәнийәт мәркизиниң рәиси Князь Мирзоев вә АЗТМ заводиниң баш мудири Жетписбай Едигенов елимиздики милләтләрара разимәнлик, достлуқ, течлиқ чүшәнчилириниң муһимлиғиға алаһидә тохталди. Шундақ қилип, хәйрихаһлиқ карвини Алмутидин Арысқа атланди.
Биз жуқурида тәкитләп өткинимиздәк, өткән һәптидә җумһурийәтлик Уйғур мәдәнийәт мәркизи йенида Арысқа ярдәм бериш бойичә мәхсус комиссия қурулған еди. Мәзкүр комиссия әзалири мошу ишларниң һәммисини өз зиммисигә алди.
– Биз, ҖУЭМниң бюро әзалири, тәшкилат рәиси Шаһимәрдан Нурумовниң тәшәббуси билән бу ишни қолға алған едуқ, – дәйду комиссия рәиси Шәмшиқәмәр Абдрахманова. – Хәлқимизгә иҗтимаий торлар, аммивий әхбарат васитилири арқилиқ мураҗиәт қилдуқ. Хошал қилғини, бу ишқа яшларму, чоңларму бирдәк қатнашти. 200 тәңгә әвәткән пенсионерлиримизму болди. Демәк, хәлқимиз өзгиниң қайғусиға һечқачан бепәрва қаримайдекән. Униңдин ташқири тиҗарәтчиләр көп ярдәм қилди. Уларниң айримлири қурулуш материаллирини йәткүзүп бәрди. Бизгә келип чүшкән мәлуматларға қарисақ, һазир Арысқа асасән қурулуш материаллири һаҗәт екән. Шуңлашқа биз асасән шуларни йәткүзүшни мәхсәт қилдуқ. Бүгүн Алмутидин Арысқа атлинидиған карванда ҖУЭМниң бәш вәкили болиду. Улар ярдәмни тегишлик орунларға йәткүзүп, арыслиқларға қазақстанлиқ уйғурларниң салимини йоллайду. Пурсәттин пайдилинип, барлиқ қериндашлиримға тәшәккүр изһар қилмақчимән.
Мәлумки, 28-июньғичә Арыс толуғи билән партлаш маддилиридин тазиланди. Мошу күнгә қәдәр 20 миңдин ошуқ шәһәр турғуни өйлиригә мәхсус автобусларда қайтип кәлди. Дөләт органлири вәкиллириниң тәкитлишичә, Арыста һечқандақ ховуп йоқ. Һөкүмәтниң қарариға бенаән, һәрбир арыслиққа 100 миң тәңгә көләмидә бир вақитлиқ ярдәм көрситилидиған болиду. Қазақстан Ички ишлар министрлиги пәвқуладдә әһваллар бойичә комитетниң рәиси В.Беккерниң ейтишичә, алдин-ала тәхминләр бойичә Арысни толуғи билән әслигә кәлтүрүш үчүн 20 миллиард тәңгә һаҗәт екән. Бу мәбләғ җумһурийәт бюджетидин бөлүнидиған болиду.
Тәкитләш лазимки, Түркстан вилайитиниң һакими Өмүрзақ Шөкеев бир ай давамида Арыста яшап, барлиқ ишларни өзи назарәт қилидиған болди. Һазир қурулуш, җөндәш ишлири қизғин давамлашмақта.

http://uyguravazi.kazgazeta.kz/?p=39943

Бөлүшүш:
Реклама

ЖАВАП ҚАЛДУРУҢ

Пожалуйста, введите ваш комментарий!
пожалуйста, введите ваше имя здесь