Балилиримизни ана тилда оқутайли!

0
54

Биз Уйғурларда » Ана тилим — дана тилим» дегән әжайип нәқил бар. Бу нәқилдә ейтилған даналиқ хәлқимизниң өз тилини нәқәдәр әзизлигәнлигини, улуқлиғанлиғини вә ана тили билән мәғрурланғанлиғини байқаймиз. Әждатлиримиз асрап кәлгән ана тилимиз — бизниң кимлигимизни, миллий әнъәнә вә адәтлиримизни башқа хәлиқләр қатарида Уйғурларниңму дуния мәдәнийитигә зор һәссә қошқан вә қошуватқан улуқ бир милләт екәнлигимизни дәлиллигүчи һәм ипадилигүчи васитә.
Уйғур тили билән исми аләмшумул пәрзәнтлиримиз пәқәт Уйғур хәлқиниң пәхри әмәс, бәлки пүткүл инсанийәтниң махтиниши дәп ейтиш мубалиғә әмәстур.
Амма бизниң әждатлиримиз ХХ1 әсиргә кәлгәндә өз әвлатлириниң ана тилиниң қәдирийитини йоқутуп қоюшқа дучар болидиғанлиғини хиялиғиму кәлтүрмисә керәк, еһтимал.
Ана вәтинимиздә яшаватқан қериндашлиримизни бүгүнки күндә ассимиляция қилиш, миллий әсир-әтиқиләрни дәпсәндә қилиш, инсан сүпитидә кимлигини йоқитиш охшаш вәһшиликләр йүз бериватқанлиғи аләмгә мәлум.
Чегариниң бу тәрипидә, йәни Оттура Азия вә Қазақстан жумһурийәтлиридә истиқамәт қиливатқан түркий тиллиқ қериндашлар Совет идеологиясиниң тәсири астида 70 жилдин ошуқ вақит мабайнида өз ана тилиға зиян кәлтүрди. Орус тилини өзләштурдуқ. Орусниң мәдәнийитигә тиз пүктуқ.
Әнди Қазақстан Жумһурийити өз мустәққиллигини қолға алғандин бери жумһурийәттә яшаватқан һәр бир этнос өз ана тилида оқуш мүмкинчиликлиригә егә болди. Бу жәһәттин биз Уйғурларға яритилған мүмкинчиликләр билән шараитларни башқиларға селиштуруп болмайду. Уйғурлар зич яшаватқан һәр қандақ йезиларда уйғур мәктәплири можут. Лекин шу мәктәпләрдә ана тилда оқуйдиған қара көзлиримизниң азлиғи әпсусландуриду.
Ана тиллиқ мәктәп немиси билән алаһидә?
Ана тиллиқ мәктәптә дәсләп ана тилимизни үгиниду. Тилимиз арқилиқ мәдәнийитимиз, урпи-адәтлиримиз, тарихимиз вә һаказилар балилиримизниң дилиға қониду. Буниң йәкүнидә улар милләтпәрвәр болуп тәрбийилинип, өз хәлқиниң миллий дәстүрлирини билиш арқилиқ башқа хәлиқләргә һөрмити һасил болиду. Дунияға болған көз қариши өзимизгә хас мллийлик билән суғурилиду. Шуңлашқа балини баштин ана тилда оқутуп тәрбийилисәк, келәчәктә башқа тилларға болған қизиқиши, өзгә милләтләргә болған һөрмити өзлигидин ойғинидиғанлиғиға ишәнчим камил.
Бу күнләрдә йезиларда 1-синипқа бала топлаш рәсмий жүргүзиливатиду. Шу мәсилигә бағлиқ мәктәп йешиға толған балилиримизни ана тилда оқутишқа алдирайли. Балилиримиз ана тиллиқ болуп йетилсун. Чүнки хәлқимизниң истиқбали — бүгүн мәктәп босуғисини атлаш алдида турған әйнә шу қара көзлиримизниң қолида. Бу мәсилигә үзә қаримайли, һөрмәтлик ата-анилар!
Һөрмәт билән Тельман Нурахунов,
язғучи.

Бөлүшүш:
Реклама

ЖАВАП ҚАЛДУРУҢ

Пожалуйста, введите ваш комментарий!
пожалуйста, введите ваше имя здесь