Мәҗлис депутати сәнъәткарлар билән учрашти

Дүшәнбә күни Алмута шәһиридики «Достлуқ өйидә» җумһурийәтлик Уйғур этномәдәнийәт мәркизиниң кәңәйтилгән мәҗлиси болуп өтти. Мәҗлис җәриянида Қазақстан Җумһурийити Парламенти Мәҗлисиниң депутати, Қазақстан хәлқи Ассамблеяси Кеңишиниң әзаси, җумһурийәтлик Уйғур этномәдәнийәт мәркизиниң рәиси Шаһимәрдан Нурумов Қ.Ғоҗамияров намидики дөләт академиялик Уйғур музыкилиқ-комедия театриниң иҗадий коллективи билән учришип, «дүгләк үстәл» әтрапида сөһбәтләшти.

0
42

Дүшәнбә күни Алмута шәһиридики «Достлуқ өйидә» җумһурийәтлик Уйғур этномәдәнийәт мәркизиниң кәңәйтилгән мәҗлиси болуп өтти. Мәҗлис җәриянида Қазақстан Җумһурийити Парламенти Мәҗлисиниң депутати, Қазақстан хәлқи Ассамблеяси Кеңишиниң әзаси, җумһурийәтлик Уйғур этномәдәнийәт мәркизиниң рәиси Шаһимәрдан Нурумов Қ.Ғоҗамияров намидики дөләт академиялик Уйғур музыкилиқ-комедия театриниң иҗадий коллективи билән учришип, «дүгләк үстәл» әтрапида сөһбәтләшти.
Мәзкүр баш қошушқа Алмута шәһәрлик ҚХА Кативатиниң рәһбири Назар Балғимбаев вә «Достлуқ өйиниң» мудири Талғат Алдажаров қатнашти.

Шәмшидин АЮПОВ,
«Уйғур авази»

Учришишни киришмә сөз билән ачқан Шаһимәрдан Үсәйиноғли дәсләп көпчиликни техи йеқиндила нишанлап өткән мусулманларниң муқәддәс мәйрими — Қурван һейти билән тәбриклиди. Андин у елимизниң Тунҗа Президенти – Елбасы Нурсултан Назарбаевниң «Келәчәккә нишан: мәнивий йеңилиниш» мақалисида һәм «Қазақстанлиқларниң паравәнлигиниң өсүши: тапавәтниң вә турмуш сүпитиниң яхшилиниши» Мәктүбидә алға сүрүлгән мәсилиләр, җүмлидин қазақстанлиқлар паравәнлигиниң өсүши, турмуш сүпитини яхшилаш, билим, илим-пән вә саламәтликни сақлашқа болған хираҗәтниң көпийиши, сағлам һаят тәризини тәрәққий әткүзүш, қазақстанлиқларниң мәмликәттики өзгириш җәриянлириға қатнишиши, бийил яшларни вә аилә институтини комплекслиқ қоллап-қувәтләшниң көздә тутулғанлиғи, 2019-жилниң “Яшлар жили” дәп елан қилинғанлиғиниң дөләт сәяситиниң әвзәллиги екәнлиги вә башқиму көпчиликни ойландуруватқан бирқатар муһим мәсилиләр һәққидә әтраплиқ чүшәнчә бәрди вә Мәҗлистә атқурулған ишлар, қобул қилинған муһим қанунлар һәққидә ейтип өтти. Депутат шундақла өз сөзидә Қазақстанниң әң чоң байлиғи, елимиздики разимәнлик, достлуқ, бирлик вә өмлүк екәнлигини, мошундақ иҗил-инақлиқ билән достлуқниң уютқуси Тунҗа Президент — Елбасы Нурсултан Назарбаев вә Дөләт рәһбири Қасым-Жомарт Тоқаев екәнлигини алаһидә тилға алди.

Учришиш давамида Уйғур театриниң бир топ сәнъәткарлири, җүмлидин Э.Сәйдуллаева, Г.Насирова, Т.Аблизова, Г.Садиқова депутатқа өзлирини ойландуруп жүргән соаллар билән мураҗиәт қилди. Болупму айрим иҗтимаий мәсилиләрниң һәм артистларға атақ-унван бериш һәм яш сәнъәткарларниң айрим иҗтимаий мәсилилириниң техичә һәл қилинмай келиватқанлиғи тәкитләнди.

Шаһимәрдан Үсәйиноғли қоюлған айрим соалларға шу йәрдила ениқ җававини бәрсә, айрим мәсилиләрниң һәл қилиниши үчүн тегишлик органлар билән һәмкарлиқта иш елип баридиғанлиғини қәйт қилди. Мәҗлис депутати шундақла учришишқа қатнишиватқан барлиқ сәнъәткарларниң миллий сәнъитимизни тәрәққий әткүзүшкә мунасип төһписини қошуватқанлиғини һәм уларниң һәрбириниң җәмийәттә мунасип орни бар екәнлигини тилға елип, сәнъәткарлиримизниң миннәтсиз меһнитигә жуқури баһасини бәрди.
Учришиш җәриянида сөз новитини алған Қ.Ғоҗамияров намидики дөләт академиялик Уйғур музыкилиқ-комедия театриниң мудири Руслан Тохтахунов, пешқәдәм язғучи-драматург Әхмәтҗан Һашири, ҖУЭМниң Алмута шәһәрлик шөбисиниң рәиси Әбәйдуллам Җаппаров сөз болуватқан мәсилиләр әтрапида өз ой-пикирлири билән ортақлашти.
Баш қошушта пәрзәнтлиримизни ана тилида оқутуш мәсилисиму депутатниң диққәт-нәзәридин сирт қалмиди.

Шаһимәрдан Үсәйиноғли ушбу учришишниң йөнилиш-роһини ана тилимиз билән миллий мәктәплиримизни сақлап қелиш мәсилисигә қаритип, бүгүнки күндә пәрзәнтлиримизни ана тилида оқутуп, моҗут миллий мәктәплиримизни сақлап қелишниң наһайити муһим, һаятий әһмийәткә егә мәсилә болуп қеливатқанлиғини алаһидә тәкитлиди вә учришиш иштракчилиридин мүмкин болса, уйғур мәктәплири билән синиплириға бала топлаш мәсилисини йеңи оқуш жили башланғичә һәл қилишқа күч чиқиришини җекилиди.
Дәрвәқә, һазир өзимизниң бепәрвалиғимиз, өсүватқан әвладимиз тәғдиригә көйүнмәслигимиз түпәйли, миллий маарипимиз моҗут болуш яки болмаслиқ гирвигидә турмақта.

Шуни чоңқур әпсуслиниш билән тәкитләш керәкки, мундақ ховуплуқ вәзийәтни қелиплаштуруватқан пәқәт өзимиз. Қазақстанда шәкиллинип, һәр җәһәттин тәкамиллашқан миллий маарипимиз моҗут һәм у өз тарихиға егә. Әнди җумһурийитимиз мустәқилликкә еришкәндин кейин, униң тәрәққияти үчүн техиму кәң имканийәтләр яритилди. Шундақ туруғлуқ, милләтниң келәчиги болған миллий маарипимизға нисбәтән һелиғичә сус көзқарашта болуватимиз. Һазирқи пәйттә пәрзәнтлирини ана мәктәптин чәтнитип, өзгә тилда оқутушқа интиливатимиз вә бу җәриянниң жилдин-жилға овҗ еливатқанлиғи тәшвишлик. Бу мәсилә һәққидә аз ейтилмиди вә аз йезилмиди. Шуниң билән бирқатарда, бу мәсилә һәрхил дәриҗидики баш қошушларниң күн тәртивидин чүшмәй келиватиду. Амма мәсилиниң иҗабий һәл болуватқанлиғи сезилмәйватиду. Панфилов, Уйғур, Талғир, Әмгәкчиқазақ наһийәлириниң айрим йезилиридики мәктәпләрдә әһвал махтиғидәк әмәс. Оттура мәктәпләрниң уйғур синиплиридики оқуғучилар саниниң жил санап азийиватқанлиғиға қарап, әтики күндә мәзкүр билим дәргаһлиридики уйғур синиплириниң өз петичә сақлинип қалидиғанлиғи гуман-әндишә пәйда қилмақта. Бу туғутниң төвәнләп яки аһалиниң башқа җайларға көчүп кетишидин йүз бериватқан иш әмәс. Бәлки руслишип кәткән айрим яш ата-аниларниң өз балилирини сөрәп дегидәк башқа тиллиқ мәктәпләргә бериватқанлиғидин болмақта.

Тоғра, көп тил билгән яхши. Бирақ уни ана тилимизни қурван қилиш бәдилигә өзләштүрүш – ана тилимиз билән ана мәктивимизниң шәнини дәпсәндә қилиш, милләт сүпитидә өзимизни өзимиз хорлиғанлиқ әмәсму?! Ечинарлиғи, әмәлий әһвалимизниң мошундақ мурәккәплишиватқанлиғиға қаримастин, буниңға баш қатуруп, униңдин чиқиш йолини издәштүрүватқан биз йоқ. Көпчилигимиз йәнила шу ғәпләт уйқисида жүрүватимиз. Дунияда қош-қош мустәқил дөләтлиригә егә милләтләр бар. Шундақ болсиму, улар әтики күнниң ғемини йәп, миллий тәрәққиятниң койида яшаватиду. Биз немимизгә ишәш қилимиз һәм қачан ойғинимиз, қериндашлар?! Тилимиздин, мәктәплиримиздин айрилсақ, немимиз қалиду?!

Учришиш җәриянида Шаһимәрдан Нурумов мәзкүр мәсилигә тәпсилий тохталди вә бу йөнилиштә атқурулушқа тегишлик ишларниң әһмийитини тәкитләп, бу җавапкәрлик пәйттә өйму-өй, кочиму-коча меңип, сәкпарә болуватқан жигитбашлири, җәмийәтлик ишларниң активистлири билән биллә, ушбу учришишқа қатнишиватқан зиялиларниң, шу җүмлидин сәнъәткарлиримизниңму техиму зор паалийәтчанлиқ көрситидиғанлиғиға үмүт қилидиғанлиғини қәйт қилди.
Учришиш ахирида Шаһимәрдан Үсәйиноғли ҖУЭМниң бир топ башқарма әзалириға гуванамиләрни тапшурди.

Хулләс, уйғур сәнъәткарлири билән «Достлуқ өйидә» өткән достанә учришиш әйнә шундақ роһта аяқлашти. Мәҗлис депутати сәнъәткарлиримиз билән жут башқуруватқан шәхслиримизниң паалийитигә утуқ тиләп, уларни бамәслиһәт билән ишләшкә чақирди.
Очуқ сөһбәт шараитида өткән учришиштин кейин Қазақстан Җумһурийити Парламенти Мәҗлисиниң депутати Шаһимәрдан Нурумов реконструкция ишлири жүргүзүлүватқан Уйғур театрини зиярәт қилип, қурулуш ишлириниң кетип бериши билән тонушти.
***

Әтиси Мәҗлис депутати Талғир наһийәсидә болуп, җамаәтчилик вәкиллири билән учрашти. Баш қошуш җәриянида асасән аһалини ичидиған таза су, газ билән тәминләш, йәр һөҗҗәтлирини рәсмийләштүрүш мәсилилири тоғрилиқ сөз болди.
Шаһимәрдан Үсәйиноғли җамаәтчилик вәкиллири тәрипидин қоюлған соалларға ениқ һәм тәпсилий җавап бәргәч, қазақстанлиқлар паравәнлигиниң өсүши, турмуш сүпитиниң яхшилиниши вә башқиму бирқатар муһим мәсилиләр һәққидә әтраплиқ ейтип өтти. Шундақла депутат Мәҗлистә атқурулуватқан ишлар, қобул қилинған муһим қанунлар тоғрилиқ изаһ бәрди.

Шу күни Шаһимәрдан Нурумов наһийәлик ағриқханиға қәдәм тәшрип қилип, ағриқханиниң йеңидин селинған бөлүмлирини вә шу күни Америкидин кәлтүрүлгән йеңи рентген аппаратини көздин кәчүрүп, медицина хадимлири билән сөһбәтләшти.
Мәҗлис депутати наһийәгә болған сәпири давамида 70 гектар мәйданда алма өстүрүш билән мәшғул болуватқан «Баймене» ҖЧЙниң коллективи билән учришип, уларниң тирикчилик нәпәси билән тонушти вә 5000 тонна алма сиғидиған тоңлатқуни көздин кәчүрди.
Сәпәр давамида Мәҗлис депутати Шаһимәрдан Нурумовқа Талғир наһийәсиниң һакими Рыскелды Сатбаев һәмра болди.

Бөлүшүш:
Реклама

ЖАВАП ҚАЛДУРУҢ

Пожалуйста, введите ваш комментарий!
пожалуйста, введите ваше имя здесь