Рабийә қадир: Европа Парламенти күткәнлиримизниң бир қисмини орундиди, Илһам Тохтини тәбрикләймән!

0
70

Илһам Тохти сөзлигән һәқ сөзлири үчүн өзиниң бешиға немә күнләр келидиғанлиқини йахши биләтти, чүнки у Хитайниң сийасий вәзийитиниң болупму уйғурларға тутқан сийаситиниң йөнилишини ениқ көрәлигән вә бүгүнки басқучини алдин көрәлигән бир тәтқиқатчи иди. Шуңа у дунйада мисали аз учрайдиған шәкилдә вәсийәтнамә йезип қойуп туруп, һәрикитини давамлаштурған бир пидакар паалийәтчи иди. Шундақ у өзиниң тәклип вә тәнқидий пикирлиригә Хитай даирилириниң қулақ салмайдиғанлиқини, буни һақарәт һес қилидиғанлиқини , бу сәвәблик өзигә еғир жаза беридиғанлиқини йәни тәнқид пикирлириниң хитайниң пәйлини өзгәртәлмәйдиғанлиқини йахши биләтти.

Шундақ туруқлуқ, немә үчүн ахири мәңгүлүк қамақ йаки өлүм билән ахирлишидиған бир йолдин- Хитайни бир қанун дөлити болушқа чақириш вә уйғурларға өз қанунида вәдә қилинған һәқлирини беришкә чақириштин ваз кәчмиди? Чүнки у бу чақириқиниң хәлқара жамаәтниң, жүмлидин Европа бирликиниң қулиқиға йетидиғанлиқини биләтти; шуңа Илһам Тохти тутулуш хәвпи бурниға пурап турсиму, Хитай дөләт бихәтәрлик күчлири тохтимастин “чай сөһбити“гә тәклип қилип турсиму, намәлум қара күчләр арқисидин әгишип машинисини үсүп тәһдит салсиму, чәтәл ахбаратиниң жүмлидин ғәрб ахбаратиниң зийаритини қобул қилишни тохтатмиди. Чүнки у бу һәқ вә адаләт чақириқи ғәрб әллириниң қулиқиға йетип барса, ғәрб дөләтлириниң тәсирлинидиғанлиқи вә уйғур мәсилисигә қол тиқидиғанлиқиға ишинәтти вә буни үмид қилатти. Бу әмәлийәттә Илһам Тохтиниң өзиниңла үмиди вә күткини әмәс, пүтүн уйғур хәлқиниң үмиди вә күткини иди. Шуңа қолға елишниң алдида Бейжиңдики Америка вә Европа дөләтлири әлчиханилири билән ашкара һалда мунасивәт қилип турған; сөһбәтләр уйуштуруп, уйғур вәзийитини изчил тонуштурған иди.

Бүгүн Европа Парламенти, Илһам Тохтиға Сахаров мукапатини бериш арқилиқ, Илһам Тохтиниң вә уйғур хәлқиниң өзидин күткәнлириниң бир қисмини орундиған болди, интайин хурсәнмән вә қизғин тәбрикләймән. Шуниң билән бирликтә Илһам Тохтиниң күткини йалғуз диққәт қилиш вә илһам беришла әмәс, бәлки әмәлий һәрикәттур. Илһам Тохти, бүгүн Шәрқи Түркистанда йиғивелиш лагерлири арқилиқ ижра қилиниватқан ирқий қирғинчилиқни алдин көрәлигән вә һайатини доға тикиш йоли билән бу қирғинчилиқниң алдини елишқа тиришип баққан бир уйғур зийалийсидур. Шуңа мән Европа бирликини Шәрқи Түркистандики йиғивелиш лагерлирини тақатқузуш үчүн Хитайға, худди Америка һөкүмитидәк әмәлий тәдбир қоллунушқа чақириқ қилимән.

 

Уйғур миллий һәркити рәһбири  – Рабийә Қадир.

Бөлүшүш:
Реклама

ЖАВАП ҚАЛДУРУҢ

Пожалуйста, введите ваш комментарий!
пожалуйста, введите ваше имя здесь